راجت صورة لزجاجة زيت غذائي بداخلها “فأر ” ميت و مغلة من المصنع و عبر متداولي الصورة عن غضبهم و مدى استرخاء الدولة في مراقبة المصانع ، و كتب صاحب محل مواد غذائية و الذي عثر على الزجاجة على صفحته بفايسبوك:
صباح الخير
اليوم صارتلي غريبة ما حبيتهاش تتعدى بزهدة و حبيت الناس الكل تعرفها .
التاريخ: 29 أوت 2015
التوقيت : الساعة 08:30 دقيقة
المكان : حانوتنا الكائن بشارع السلام بالقطار
يا سيدي نخدم على روحي كيما العادة و الناس تشري في فطور الصباح و اللي فايق مالخمسة ولا السته بدا يخمم فالغداء شنوة ، فمة مرا جارتي قالت اعطيني زوز كيلو سميد احرش و مشت تصب فالزيت ، فرغت دبوزتين و نشوف فيها تفجعت و في إيدها دبوزة ركزتها فوق الكنتوار ، أنا ما إنتبهتش فالأول قلتلها شبيك ؟؟ المرا ما تكلمتش و بقت اطالع للدبوزة ، وقت اللي ثبتت في دبوزة الزيت نلقى في وسطها “فار” !! …. دبوزة زيت جاية مسكرة مالمعمل في وسطها فار كيما تشوفوا فالتصاور ، و يقولوا الأمراض و الوبا و الهم و الهول منين جاينا ؟؟؟
حكاية كيما هكة ما يلزمهاش تتعدى بالساهل ولا يتسكت عليها ، أما يبقى السؤال آش انجم نعمل انا المواطن البسيط فالحالة هاذي ؟؟ و زعم كيف نهزها و نقدم شكوى في ديوان الزيت ولا المعمل زعمة يسمعوني و يعطوها أهمية الحكاية ولا نولي مطلوب ؟؟
اللهم أشهد أني بلغت
#صباح_الغرايب_في_بلاد_العجايب
ليست هناك تعليقات:
إرسال تعليق